Madrigal

langaði að segja ef þú skyldir lesa mig
að það rignir hér hjá mér og það er ósköp notalegt
ég fékk mér spagettí með súrsuðum paprikum og parmesanosti
líka kóríander
í eftirrétt var suðusúkkulaði
þaninn ágústmánuðurinn leitar á mig í þessu nýafstaðna tungli
og eftir yfirlið tunglsins og frekju annarra inngripa hef ég ákveðið að treysta engum orðum einungis stunum
kurr og bí engisprettna og kælandi ég meina tælandi regn á bárujárns
blautum hugsunum á bak við
og ísköldu ístaði
orð þín eru grafin með tönnum barna minna og typpahárum gamalla elskhuga (æ ég man aldrei hvort typpi er með ypsiloni - typpi - tippi - tæpt að standa í stafrófsbili og kaupa sér blautar caprí og ódýrt freyðivín, tæpara en blautt tyiyppi tælirófurassinn þinn) og ef önnur hár yrðu á vegi mínum þá fengju þau líka fallegan söng og heiðna greftrun meðal runna og ræfla
ég er búin að fara með faðirvorið og ég hef ekki fróað mér í dag né sáð neinum fræjum í mold
en hef verið að hugleiða að láta sesamfræin spíra
eitthvað verð ég að gera við þig og haustið

já kannski er þetta mynd af typpi að hausti á eyðibýli og moldarslóðanum að hárunum í jörðinni